Har koi dil ki hatheli pe hai sehra rakhey
Kis ko sairaab karey aur kise pyasa rakhey

Umr bhar kon nibhata hai taaluq itna
Ae meri jaan ke dushman tujhe ALLAH rakhey

Humko acha nahi lagta koi humnaam tera
Koi tujhsa ho to phir naam bhi tujhsa rakhey

Dil bhi pagal hai ke us shakhs se wabasta hai
Jo kisi aur ka hone de na apna rakhey

Kam nahi tama-e-ibadat bhi to hirs-e-zar se
faqr to woh hai ke jo deen na duniya rakhey

Hans na itna bhi faqeeron ke akele pan per
Jaa, Khuda meri tarah tujhko bhi tanha rakhey

Yeh qanaa-at hai, itaa-at hai ke chahat hai 'faraz'
Hum to raazi hain woh jis haal mein jaisa rakhey !!

Ahmed Faraz.
(Kitab : Khaab-e-gul pareshaan hai,, Safha no. 61)

Send Free Text Messages - Student SMS - Romantic SMS